#DigitalSociety: A chosaint ar chearta an duine san aois dhigiteach

Cuimsíonn Duais Sakharov um Shaoirse Smaointeoireachta tacaíocht na Parlaiminte do chearta an duine. I rith na bliana tagann líonra iarbhuaiteoirí Dhuais Sakharov le chéile chun saincheisteanna a aibhsiú. Ar an 23 agus 24 Bealtaine tháinig naonúr iarbhuaiteoirí Sakharov le chéile sa Bhruiséil chun plé a dhéanamh, i measc nithe eile, ar conas iad a chur in oiriúint do na dúshláin atá roimh chosantóirí chearta an duine sa ré dhigiteach.

Ba é Cristian Dan Preda, leaschathaoirleach an fhochoiste um chearta an duine, a bhí ina chathaoirleach ar an seisiún ar chearta an duine sa ré dhigiteach a chosaint.

Rinne Sophie Busson, ó Tuairisceoirí Gan Teorainneacha, a bhuaigh Duais Sakharov in 2005, na dúshláin a sceitseáil: "Tá an t-Idirlíon ríthábhachtach ar thaobh amháin mar ionstraim do chosantóirí chearta an duine toisc go dtugann sé rochtain ar fhaisnéis agus go gceadaíonn sé díospóireacht. Ach ag an am céanna , uaireanta le cabhair ó chuideachtaí príobháideacha, is ionstraim an-chumhachtach é do rialtais.” Dúirt sí freisin: “Tá imní ann faoi úsáid ollfhaireachais ar an idirlíon; fiú i dtíortha Eorpacha níl aon duine cosanta ó bhagairtí den sórt sin.”

Dúirt Marie-ChristineVergiat, ball Francach den ghrúpa GUE/NGL: “Ba cheart go mbeadh an AE ina shampla ag troid ar son chearta an duine, ach ar an drochuair tá imní slándála ag tarraingt ar an treo eile sinn faoi láthair.”

Thug Zhanna Litvina, ó Chumann Iriseoirí na Bealarúise, a bhuaigh an duais in 2004, samplaí faoin gcaoi a gcuireann rialtas na Bealarúise srian ar chearta an duine ar an idirlíon. Dúirt sí go raibh bagairt ar shuíomh Gréasáin a thugann faisnéis faoi mheath déimeagrafach na tíre a dhúnadh as “polasaí déimeagrafach an rialtais a mhilleadh”.

Phléigh Vitaliy Ponomarev, ó Memorial, eagraíocht Rúiseach ar bronnadh an duais uirthi in 2009, an chaoi a raibh reachtaíocht fhrith-antoisceach in úsáid sa Rúis: “Níl aon chur síos caighdeánach ar cad is antoisceachas ann agus cuireann na cúirteanna na forálacha seo i bhfeidhm go treallach.”

Aiseolas

Labhair Elmar Brok, cathaoirleach an choiste um ghnóthaí eachtracha, faoin gcaoi a mbaineann tíortha mar an Rúis agus an tSín úsáid as an tsaoirse cainte san Eoraip chun a gcuid bolscaireachta a scaipeadh. Dúirt sé nach raibh an ceart chun freagra a thabhairt ag dul i muinín an fhrithphopaganda, ach chun trédhearcacht, rochtain ar fhaisnéis, iolrachas agus na meáin saora a chur chun cinn.

Líonra Duais Sakharov

Tá líonra dhuaiseanna Sakharov comhdhéanta d’iarbhuaiteoirí Dhuais Sakharov agus d’fheisirí Eorpacha. Bunaíodh é in 2008 chun aird a tharraingt ar sháruithe ar chearta an duine agus chun tacú le hiarbhuaiteoirí agus na cúiseanna atá leo.

Bronntar Duais Sakharov gach bliain ó 1988 chun idirdhealú a dhéanamh ar dhaoine eisceachtúla atá ag troid ar son chearta an duine ar fud na cruinne agus chun aird a tharraingt ar a gcúis.