Bliain an Aontais Eorpaigh um Fhorbairt: Ár domhan, ár dínit, ár dtodhchaí

B'fhéidir nach bhfuil geilleagar na hEorpa ag rith faoi lánseol, ach ní chiallaíonn sé sin go bhfuil dearmad déanta aige ar dhaoine eile. Is é an AE fós an deontóir cúnaimh is mó ar domhan agus de réir suirbhé Eorabharaiméadair in 2012, creideann 85% d’Eorpaigh gur cheart don Eoraip leanúint ar aghaidh ag cabhrú le tíortha i mbéal forbartha. Is í an bhliain seo chugainn an Bhliain Eorpach um Fhorbairt, chun ceiliúradh a dhéanamh ar a bhfuil bainte amach cheana féin agus féachaint cad atá le déanamh fós. Pléifidh an coiste forbartha an bhliain téama inniu (11 Samhain).

Is é mana na Bliana Eorpaí um Fhorbairt in 2015 ná “Ár ndomhan, ár ndínit, ár dtodhchaí”. I rún maidir leis an mbliain a glacadh i mí Aibreáin 2014, dúirt na Feisirí: “Tá tacaíocht leanúnach do chomhar um fhorbairt ríthábhachtach i ndomhan atá ag athrú go tapa. Tá thart ar 1.3 billiún duine fós ag maireachtáil i bhfíor-bhochtaineacht ioncaim agus níltear ag freastal go fóill ar riachtanais forbartha daonna go leor eile.”

Leag baill an choiste forbartha béim freisin ar thábhacht na forbartha. Dúirt Linda McAvan, cathaoirleach an Choiste, comhalta den RA den S&D: “Is deis thábhachtach í an Bhliain Eorpach um Fhorbairt chun saoránaigh a chur i ngleic le hobair institiúidí an AE i mbeartas forbartha. Bhí ról lárnach ag an bParlaimint i gcruthú na bliana agus mar sin de. tá sé ríthábhachtach go mbeimid rannpháirteach go gníomhach ar fud an Aontais Eorpaigh ar fad in 2015. Cinnteoidh ár ngníomhaíochtaí pleanáilte go n-oibrímid i gcomhar le hoifigí náisiúnta Pharlaimint na hEorpa, an Coimisiún Eorpach, an tsochaí shibhialta agus geallsealbhóirí eile chun a chinntiú go mbeidh sé sofheicthe chomh forleathan agus is féidir."

Dúirt Charles Goerens, ball Lucsamburgach den ghrúpa ALDE a scríobh rún na Parlaiminte a glacadh i mí Aibreáin: "Má bhaineann an pholaitíocht le rogha, baineann beartas forbartha le dínit."