Iarrann an tOmbudsman ar institiúidí an AE chun rialacha sceithireacht a ghlacadh

Tá sé faighte amach ag an Ombudsman Eorpach, Emily O’Reilly (sa phictiúr), go bhfuil seachtar as na naoi n-institiúid de chuid an AE a cheistigh a hoifig fós le cloí le hoibleagáid Eanáir 2014 rialacha inmheánacha sceithireachta a thabhairt isteach. Cé go bhfuil coiste idir-institiúideach ag scrúdú cur chuige comónta, tá sí ag tathant ar an gcoiste a chuid oibre a chur i gcrích chomh tapa agus is féidir.

Rinne an tOmbudsman fiosrúcháin ar naoi n-institiúid de chuid an AE, is iad sin an Coimisiún, an Pharlaimint, an Chomhairle, an Chúirt Bhreithiúnais, an Chúirt Iniúchóirí, an tSeirbhís Gníomhaíochta Seachtraí, an Coiste Eacnamaíoch agus Sóisialta, Coiste na Réigiún agus an Maoirseoir ar Chosaint Sonraí. Is iad an Coimisiún agus an Chúirt Iniúchóirí amháin a thug isteach rialacha inmheánacha um sceithireacht.

Dúirt Emily O’Reilly: “Is gá go mbeadh a fhios ag an bpobal go bhfáiltíonn institiúidí an AE roimh an sceithireacht agus go gcosnaíonn siad sceithirí i gcoinne frithbheartaíochta chun a chinntiú go gcuirtear mí-iompar nó éagóir thromchúiseach i riarachán an AE chun solais. Cé go bhfuil díomá orm go bhfuil seacht bpríomhinstitiúid de chuid an AE gan na rialacha sin glactha fós, molaim an Coimisiún agus an Chúirt Iniúchóirí as é sin a dhéanamh."

Rialacha sceithireachta an Ombudsman féin

Tá sé de dhualgas ar gach fostaí a oibríonn do riarachán an AE labhairt ar a son má thagann siad ar an eolas faoi neamhrialtachtaí tromchúiseacha le linn a gcuid oibre. Ó Eanáir 2014 i leith, tá oibleagáid ar gach institiúid de chuid an AE rialacha inmheánacha um sceithireacht a thabhairt isteach.

I mí Iúil 2014, d’oscail an tOmbudsman imscrúdú ar a tionscnamh féin trí liosta ceisteanna a chur chuig na naoi n-institiúid, lena n-áirítear conas a chosnaíonn siad sceithirí, agus conas a spreagann siad daoine ó lasmuigh d’institiúidí an AE an fheadóg a shéideadh.

Tá coiste idir-institiúideach ag plé faoi láthair an féidir leis na hinstitiúidí cur chuige coiteann a ghlacadh i leith a n-oibleagáidí sa réimse seo. Spreagann an tOmbudsman an coiste a phlé a thabhairt chun críche a luaithe is féidir. Tá an cinneadh iomlán sa chás seo ar fáil anseo.

Aiseolas

Ina theannta sin, chun treoir trí eiseamláir a thabhairt, dhréachtaigh an tOmbudsman a rialacha sceithireachta féin, bunaithe ar chomhairliúcháin lena foireann, agus thug sí cuireadh do pháirtithe leasmhara a dtuairimí a thabhairt. Tá súil aici go bhféadfaidh an leagan deiridh de na rialacha d’oifig an Ombudsman feidhmiú mar threoir úsáideach do dhaoine eile. Tá siad ar fáil anseo.

Imscrúdaíonn an tOmbudsman Eorpach gearáin faoi dhrochriarachán in institiúidí agus i gcomhlachtaí an AE. Is féidir le haon saoránach den AE, cónaitheoir, nó fiontar nó comhlachas i mballstát, gearán a dhéanamh leis an Ombudsman. Cuireann an tOmbudsman bealach tapa, solúbtha agus saor in aisce ar fáil chun fadhbanna a réiteach le riarachán an AE.

Le haghaidh tuilleadh eolais:

http://www.ombudsman.europa.eu

Comhroinn an t-alt seo: