Abhcóidí óige i lár an aonaigh sa Phlé Tithíochta

Ar an 27 Márta, bhuail an Coimisinéir Eorpach um Fhuinneamh agus Tithíocht, Dan Jørgensen, le hionadaithe óige sa Bhruiséil le haghaidh Idirphlé Beartais Tithíochta don Óige, a eagraíodh i gcomhpháirtíocht le Generation Climate Europe. Thug na rannpháirtithe, a roghnaíodh ó réimse leathan ionadaithe mac léinn, ó bheartas sóisialta, ó ailtireacht agus ó phleanáil uirbeach, peirspictíochtaí éagsúla ach aontaithe chuig an mbord. 

Léirigh an plé cuspóir comónta idir an Coimisinéir agus abhcóidí na hóige maidir le Colún a Ceathair de Phlean Tithíochta Inacmhainne na hEorpa, a dhíríonn ar thacaíocht a thabhairt dóibh siúd is mó atá buailte ag an ngéarchéim tithíochta. Ba ábhar imní ar leith é eisiamh daoine óga ó chúlraí faoi mhíbhuntáiste, a bhfuil bacainní rompu maidir le hoideachas, cúrsaí oiliúna agus fostaíocht a bhfuil iarmhairtí eacnamaíocha agus sóisialta forleathana acu. Ba phríomhcheisteanna eile iad tuairimíocht tithíochta, airgeadú tithíochta agus cearta cíosa a tugadh chun cinn. 

D’athdhearbhaigh an Coimisinéir Jørgensen an phráinn atá ann infheistíocht mhéadaithe a shlógadh i dtithíocht do mhic léinn tríd an gclár InvestEU agus an tArdán Infheistíochta Uile-Eorpach, mar atá leagtha amach i ngníomh 9 de Phlean Tithíochta Inacmhainne na hEorpa. 

D’áitigh na rannpháirtithe go gcuirfí roinnt gníomhartha eile sa phlean i bhfeidhm, lena n-áirítear measúnú a dhéanamh ar indéantacht scéime ráthaíochta cíosa chun an gá le héarlais slándála a laghdú nó a dhíchur, scéim phíolótach faoi Erasmus+ do mhic léinn soghluaiste ó chúlraí faoi mhíbhuntáiste agus samhlacha cóiríochta níos nuálaí do mhic léinn agus do dhaoine óga chomh maith le scéimeanna spriocdhírithe chun a rochtain ar thithíocht a fheabhsú.  

Go ríthábhachtach, aithníodh an t-idirphlé mar phointe tosaigh, ní mar chonclúid. Tríd an idirphlé, bhí rannpháirtithe ina bhfinnéithe ar fhuinneamh óige na hEorpa agus ar chumhacht uathúil spiorad comhair agus comhoibrithe an AE. Tá daoine óga ag an mbord agus níl siad ag fanacht le réitigh, tá siad tiomanta iad a thiomáint. Agus iad ag achoimre ar an bplé, bhí ionadaithe na hóige soiléir, “ní réiteofar an ghéarchéim tithíochta dúinne, ach linne.”  

Comhroinn an t-alt seo: