An Chomhairle Fostaíochta, Beartais Shóisialta, Sláinte agus Gnóthaí Tomhaltóirí, 9-10 Nollaig 2019

Bhí díospóireacht ag an gComhairle ar 'Geilleagar na Folláine - na chéad chéimeanna eile in infheistiú sa tsláinte mar phríomh-chomhpháirt di', bunaithe ar phlépháipéar. Mhalartaigh na hairí tuairimí ar ábhair a bhaineann leis an tsláinte, go háirithe meabhairshláinte, aosú sláintiúil agus claochlú digiteach na seirbhísí sláinte agus sóisialta.

Bunaithe ar nóta ón Uachtaránacht, bhí díospóireacht ag na hairí freisin maidir le conas an comhar agus an comhordú a neartú d’fhonn rochtain ar leigheasanna ar fud an AE a fheabhsú.

Dúirt Krista Kiuru, Aire Gnóthaí Teaghlaigh agus Seirbhísí Sóisialta na Fionlainne: "Bhí an díospóireacht seo thar a bheith tábhachtach mar go gcuireann ganntanas cógas rioscaí tromchúiseacha do shábháilteacht othar. Ní mór dúinn féachaint freisin conas déileáil leis na leibhéil éagsúla rochtana ar chógais nua ar fud an Tá comhar agus comhordú ríthábhachtach, mar éilíonn na dúshláin seo bearta ar leibhéal an AE agus ar an leibhéal náisiúnta."

Chuir an Coimisiún faisnéis ar fáil faoi staid na sláinte san AE
Chuir an Coimisiún faisnéis ar fáil freisin maidir leis an staid mar atá i gcur chun feidhme Rialachán (AE) 2017/745 maidir le feistí leighis agus Rialachán (AE) 2017/746 maidir le feistí leighis diagnóiseacha in vitro.

Ar bhonn plépháipéir, bhí díospóireacht phoiblí ag na hairí ar na beartais chomhionannais inscne a bheidh ann amach anseo agus ar phríomhshruthú inscne san AE. Ag tús na díospóireachta chuir stiúrthóir na hinstitiúide Eorpaí um chomhionannas inscne (EIGE) na torthaí i láthair ar a dhéanaí maidir leis na príomhthreochtaí, an dul chun cinn reatha, agus na mórdhúshláin i réimse an chomhionannais inscne san AE.

Ghlac an Chomhairle conclúidí maidir le geilleagair chomhionann inscne san AE. Tá an glacadh mar chuid den athbhreithniú ar chur chun feidhme chlár oibre na Náisiún Aontaithe um chomhionannas inscne agus chumhachtú na mban ag an AE agus a bhallstáit (Dearbhú Béising agus an tArdán le haghaidh Gníomhaíochta).

Ghlac an Chomhairle conclúidí freisin maidir le creat straitéiseach nua AE maidir le sláinte agus sábháilteacht ag an obair. Iarrann na conclúidí ar an gCoimisiún creat nua a thíolacadh don tréimhse 2021-2027.

Ar bhonn nóta stiúrtha ón Uachtaránacht, reáchtáil na hairí díospóireacht phoiblí ar thodhchaí na reachtaíochta sóisialta i gcomhthéacs athruithe tapa ar mhargadh an tsaothair. Bhí sé mar aidhm ag an bplé bealaí féideartha a iniúchadh chun reachtaíocht an AE a fhorbairt tuilleadh i réimse na ngnóthaí sóisialta, chun deacrachtaí a aithint ina cur chun feidhme, chun smaointe a roinnt maidir le conas na bearnaí reachtaíochta atá fágtha a líonadh agus chun na dlíthe atá ann cheana a fhorfheidhmiú ar bhealach níos fearr.

Ghlac na hAirí conclúidí freisin maidir le margaí saothair cuimsitheacha. Is é príomhaidhm na gconclúidí seo béim a leagan ar an luach eacnamaíoch a bhaineann le deiseanna fostaíochta níos fearr a sholáthar do dhaoine faoi mhíchumas, do dhaoine ar bheagán scileanna agus do dhaoine atá dífhostaithe go fadtéarmach, do dhaoine óga agus do dhaoine a bhfuil cúlra imirceach acu.

Comhroinn an t-alt seo: