Iarrann #EUAuditors cuntasacht níos mó in airgeadas an AE

D’iarr Cúirt Iniúchóirí na hEorpa go gcuirfí béim níos mó ar bhreisluach i mBuiséad an AE, mar aon le breis solúbthachta agus trédhearcachta, agus cuntasacht níos fearr.

Déantar na tograí i bpáipéar faisnéise dar teideal Todhchaí airgeadas an AE: An chaoi a bhfeidhmíonn Buiséad an AE a leasú. Freagra na n-iniúchóirí ar Pháipéar Machnaimh an Choimisiúin Eorpaigh ar thodhchaí airgeadas an AE atá sa pháipéar – céim thábhachtach chun an chéad chreat airgeadais ilbhliantúil eile a fhorbairt.

Dúirt Jan Gregor, an comhalta de Chúirt Iniúchóirí na hEorpa atá freagrach as an bPáipéar Faisnéise: “Cé nach bhfuil sé de dhualgas ar Chúirt Iniúchóirí na hEorpa a tuairimí a thabhairt ar mhéid nó ar leithdháileadh chaiteachas an AE nó ar ioncam an AE a roghnú, is é an ról atá againn comhairle a sholáthar maidir le feabhas a chur ar bhainistíocht airgeadais, ar thrédhearcacht agus ar chuntasacht chóras buiséid an AE.”

Is iad príomh-mholtaí na n-iniúchóirí:

Sainmhínigh breisluach an AE

Iarrann na hiniúchóirí go n-úsáidfí coincheap láidir de bhreisluach an AE chun deiseanna a shainaithint chun breisluach a chur i mBuiséad an AE, chun feidhmíocht na gclár caiteachais a mheas agus chun rioscaí d’airgeadas an AE a bhaineann le hionstraimí agus ráthaíochtaí airgeadais a mheasúnú. Ba cheart go soláthródh an coincheap freisin nóisean níos cuimsithí agus níos cruinne ar chostais, ar shochair agus ar ghlaniarmhéideanna bhallraíocht an AE, a deir na hiniúchóirí. Molann na hiniúchóirí gur cheart don Choimisiún Eorpach anailís a dhéanamh ar na buntáistí airgeadais agus neamhairgeadais a bhaineann le ballraíocht san AE.

Buiséad an AE a dhéanamh níos freagraí

Molann na hiniúchóirí feabhas a chur ar fhreagrúlacht Bhuiséad an AE ar chúinsí athraitheacha trí é a dhéanamh níos solúbtha agus córas cúlchistí a thabhairt isteach chun caiteachas fadtéarmach agus teagmhais gan choinne a chlúdach. Plean airgeadais cuimsitheach a fhoilsiú Molann na hiniúchóirí gur cheart don Choimisiún plean airgeadais meántéarmach go fadtéarmach a fhoilsiú do Bhuiséad an AE chun an togra le haghaidh an chéad chreata airgeadais ilbhliantúil eile a chomhlánú. Ba cheart go n-áireofaí leis na gealltanais a bhfuiltear ag súil leo gan íoc, réamh-mhaoiniú agus dliteanais theagmhasacha, réamhaisnéis íocaíochta, anailís ar an gcomhthéacs eacnamaíoch agus airgeadais agus measúnú riosca. Ba cheart príomhghnéithe an phlean a nuashonrú go bliantúil.

Cuir níos mó béime ar fheidhmíocht

Molann na hiniúchóirí pleanáil airgeadais an AE a ailíniú le tosaíochtaí straitéiseacha, na príomhthorthaí atá le baint amach a shainiú, líon na gclár caiteachais, na gcuspóirí agus na dtáscairí a laghdú agus tuairisciú a dhéanamh níos sruthlínithe agus níos inrochtana.

Airgeadas an AE a dhéanamh níos trédhearcaí agus níos cuntasaí 

Iarrann na hiniúchóirí go ndéanfaí maoirseacht dhaonlathach iomlán ar airgeadas uile an AE. Ba cheart go mbeadh feidhm ag na prionsabail chéanna cuntasachta agus trédhearcachta maidir le comhlachtaí laistigh de Bhuiséad an AE, amhail an Coimisiún Eorpach, agus na comhlachtaí sin lasmuigh amhail an Banc Ceannais Eorpach agus an Banc Eorpach Infheistíochta (BEI).

Iniúchtaí poiblí a dhéanamh ar gach comhlacht a bhaineann leis an AE 

Deir na hiniúchóirí gur cheart go mbeidís in ann iniúchadh a dhéanamh ar gach comhlacht AE agus freisin ar chomhlachtaí a cruthaíodh lasmuigh d’ord dlíthiúil an AE a chuireann beartais an AE i bhfeidhm. D’áireofaí leis sin an Ghníomhaireacht Eorpach um Chosaint, an Ciste Airgeadaíochta Eorpach atá beartaithe, an Sásra Cobhsaíochta Eorpach agus oibríochtaí an BEI nach mbaineann le Buiséad an AE.

Le linn an dara ráithe de 2018, tá sé beartaithe ag Iniúchóirí an AE freisin a dtuairimí a thíolacadh ar thogra an Choimisiúin don chéad chreat airgeadais ilbhliantúil eile, ar thodhchaí an Chomhbheartais Talmhaíochta, ar bheartas comhtháthaithe a shimpliú agus ar chláir thaighde agus nuálaíochta a shimpliú. Ina theannta sin, tá sé beartaithe acu Tuairimí a eisiúint ar na tograí reachtacha don chinneadh acmhainní dílse agus ar reachtaíocht le haghaidh cláir chaiteachais earnála, de réir mar is gá.

Comhroinn an t-alt seo: